Karya Edisi 11/25-1

 

JENK ROSE

                                                                                                                                                                                                                

PIWELINGE SIMBOK

      (Kanggo anakku Risti)

.

 

Lumakuning wektu tan bisa katraju

Kaya-kaya nembe wingi

Awakmu dakemban dakkudang

Dakgedhong dakgendhong

Rina wengi tansah dakkidungake

Ora liya  ya mung kidung kang kebak panuwun

 

Tanganmu dakkanthi

Tumuju ing bangku pasinaon

Lumaku sapecak, satindak

Anggonmu jumangkah alon-alon satemah kelakon

Teteken tekun murih tekan lan katekanan

 

Ora krasa saiki wus ngakhir dewasa

Wis kudu pisah marang wong atuwa

Awit dhawahing kodrat purbaning jagat

Sliramu wus nemu kang dadi gantilaning atimu

Mung siji piwelingku ya Ndhuk…

Sing gemi, setiti lan ngati-ati

Eling lan waspada tansah kougemi

 

Sineksenan kadang rowang mitra karuh

Kang wus ngesokake tandha tresnane  marang sira ta Ndhuk

Poma dipoma muga tansah eling kang dadi piwelingku

 

Gisiking Progo, Sukra Kasih 23 Mei 2025

 

***

 

SEBA

 

 

Tinengeran surya 1 Suro dhawah dinten sukra kasih

Lumebet  1959 Dal  warsa Jawa

Ambuka wawaring rasa

Kang kinandhut ing raga sejati

Estining manah ngadhep mring Gusti

 

Gya andheku amari kelu

Raga anglumpruk tanpa daya

Sejatine uripku durung bisa netepi dhawuh

Kepara nerak paugeran Nira

Ginubel rasa kebak luput lan dosa

Suksma iki ngulambara goleki pepadhang

 

Bener luput susah seneng

Kanyata bali ana ing pribadi

Kabeh dumunung ana ing ati

Gumantung anggone metani

Bisa mulat sarira hangrasa wani

Satemah bisa mangerteni

Dununging kawula kang kudu kumawula

 

Gisiking Progo, 27 Juni 2025

 

 

Jenk Rose adalah nama pena dari Rusmiyati, S.Pd., lahir di Kulon Progo pada 2 Mei 1977, Tinggal di Kutan Brosot. Ia adalah sosok pendidik yang penuh semangat dan berdedikasi di SD Negeri 2 Pandowan. Kecintaannya pada dunia pendidikan dipadukan dengan minat mendalam terhadap seni dan sastra Jawa, yang sering ia integrasikan dalam kegiatan belajar untuk menumbuhkan rasa cinta budaya pada peserta didik.Selain aktif dalam berbagai organisasi perempuan, Bu Rusmiyati juga dikenal sebagai guru yang terbuka, mudah bergaul, dan senantiasa berusaha memberikan teladan melalui ketulusan dan kerja kerasnya. Prinsip hidupnya, “Ajur ajer nggayuh kamulyaning Gusti,” menjadi pegangan dalam setiap langkah dan pengabdiannya sebagai pendidik. Geguritannya masuk di buku Kluwung Lukisan Maha Cahaya (Antologi Puisi dan Prosa Komunitas Sastra-Ku, 2020) dan Duhkita (Komunitas Sastra-Ku, 2021).