Karya Edisi 12 / 25 - 3

 YAYUK WAHYUDI

 

JAMAN  IT

 

Lagi wingi sore isih dipondhong

Nonton jathilan ana lapangan

Ngguya- ngguyu lucu nggemesake

Agawe seneng wong nyawang kowe

Bapa biyungmu tansah ngguyu

Nyawang megal-megol jogedmu

Esemmu nyipta kangen

Sedina ora nyawang ati gerah rungsang

 

Owahing kahanan mbubrahke tatanan

Kesasar srawung dadi edan

Jaman IT ora bisa diselaki

Nanging mbilaeni yen kurang pengati-ati

Ana bocah wani wong tuwa

Merga kebrongot srawung ala

Aja rumangsa pidegsa nadyan wis nganglang donya

Yen dadi bocah kelangan subasita

Nadyan dhuwur ngelmu lan duwe panguwasa

 

Bektiya marang wong tuwa

Ndesa kuwi ora ina

Kutha tanpa desa ora ana

Tansah mituhua marang bapa biyungmu

Aja nganti kliwat mangsa anggonmu gela

Sorjati, Des 2025.

 

***

GRIMIS SORE

Padha ngantu-antu tekamu banyu

Lawas lebu ora kasapu

Grimis sore tumiba sanja

Suket thingis mesem manis

Pang-pang pragas wis ora nangis

 

Trubus ijo

Endahing suket lan gegodhongan

Resep sinawang tamba ati gowang

Kumrosak swara angin

Ngiring mendhung nyipta toya

Kidungan tumlawung saka blumbang

Kaya kendhang ngumandhang

 

Kodhok pesta andrawina

Methukke tekane  grimis sore

Kang diantu-antu seprana- seprene

Gene saiki padha kadiran

Mung padha epyek gawe memala

Ngepras alas nggempur gunung tanpa rasa

Eyang-eyung esuk menging sore nyambung

Udan neka tanpa nyapa kabeh muspra

Menungsa ...elinga, aja angkara merga bandha

Sorjati, Des 2025

 

Yayuk Wahyudi,  Alumni STIE Widya Wiwaha. Lahir bulan  Desember di Purworejo. Tinggal di Kulon Progo. Tugas terakhir di Dispusip Kulon Progo. Hobby  menulis dan  melukis. Tulisan dimuat di beberapa buku Antologi Geguritan Tilik Wewisik 2019), Crita Saka Pereng Merapi (2020), Antologi Cerkak Drangsa (2022), antologi Cerkak Donyaning Liyan (2025), Antologi Geguritan Tilase Kaweruh Netese Rasa (2025), Antologi Cernak Lentera dari Timur ke Barat,   Antologi Puisi Serumpun Suara Untuk Palestina. Cerkap  Gelang Gono Gini. Karyanya yang lain pernah dimuat di media  Pasbuja Kawi Merapi,  Aleniaku, Sippublising Mekar Sari, Djaka Lodang, Transformasi, Memetri dan Belik.