Kaget Kepati
Cerkak : D Eros Sudarjono
Wanamerta isih
kemulan pedhut tipis. Pancen mangsane rendheng. Apamaneh Wanamerta klebu tlatah
sing dhuwur. Salah sijine desa ing sikile gunung Kelud sisih kidul kulon. Dadi
ora nggumunake yen hawane adhem. Tansaya yen wayah wengi. Kiwa tengen desa isih
akeh wit-witan gedhe, senajan rada adoh teka wewengkon alas gung.
Awan kuwi, kuburan
Wanamerta wis bali sepi. Wong-wong padha bali ana omahe dhewe-dhewe. Pemakaman
jisime Narto, anake kang Gito, sing tilar donya wingi sore wis rampung. Dalanan
uga wis bali kaya biyasane. Pancen ora sepira akeh kang liwat. Omah-omah akeh kang
tutupan lawang. Sakwise saka kuburan, kabeh padha nerusake gaweyane ana sawah.
Nanging
mbalene pakdhe Gito isih reja. Sanak kadang saka liya desa isih durung bali
mulih. Padha gayeng anggone rembugan. Tengah mbale isih temata jajan lan banyu
gelasan. Apamaneh sing ana mburi. Tangga kiwa tengene lagi umyek olah-olah
kanggo nyiapake slametan. Pancen pakdhe Gito dinane kuwi lagi kasusahan.
Kepaten salah sijine anake lanang sing kembar, Narto. Krana sikil sing ngidak
beling nalika ngresiki kalenan cedhak sumur ndadekake tetanus nganti nggawa
tekan patine.
Narto
beda karo dulur kembare, Nardi. Bocahe meneng, sregep, tekun nyambut gawe.
Enthengan menawa ana tangga teparo sing njaluk tulung. Kosokbaline, Nardi rada
ndableg. Nek perkara penggaweyan pancen ora beda karo dulure. Dhasare kang Gito
lan yu Sinem, bojone, karo-karone dudu wong kesed. Mula nurun nang anak ya ora
tampik karo sembarang gaweyan. Mung
bedane, yen Narto meneng, Nardi seneng njaragi sapa wae. Senajan karep satenane
mung guyonan nanging sok kebangeten.
Tau
kedadeyan mbokdhe Karmi kepuyuh ngenggon ya merga pokal gawene Nardi. Nalika
iku mbokdhe Karmi lagi ana tuwangan kulon desa. Dheweke lagi bubar ngendhangi
anake sing mentas babaran. Ora kesusu nggone mlaku. senajan dalane sepi tur
peteng nanging merga biyasane ya ora ana apa-apa, mula dheweke ya blas ora
nduweni rasa sumelang.
Dumadakan..! Meh entek-entekan tuwangan, mak
bedunduk ...! Ana wujudan putih metu teka grumbul. Kaya ngapa kagete mbokdhe
Karmi. Cangkem nganti ora kuwawa mbengok merga wis entek atine. Wujudan kuwi
ora terus ilang. Nanging malah banjur mara nyedhaki mbodhe Karmi.
"Tak
rewangi nyangking gawane, Mbokdhe !" cluluke wujudan mau karo mbukak
sarunge sing werna putih. Senter sing ana tangane mbokdhe Karmi diurubna. Karo
isih gemeter, senter kuwi dinggo ndeleng praupane wujudan putih sing wis gawe
gawete.
"Owalah Nar... Nar....! Kowe kok seneng
gawe kagete wong tuwa ! Tujune aku isih kuwat. Lha upama nganti ceblok
jantungku, apa aku ora modar ning kene iki mau ?" mbokdhe Karmi alok
setengah rada nesu saking jengkele atine.
Ngerti
yen mbokdhe Karmi nesu, Nardi ora malah wedi. Dheweke mung ngguyu nggleges karo
nyandhak anting sing ana tangane mbokdhe Karmi. Kedadeyan kaya ngono kuwi ora
mung pisan pindho. Wong Wanamerta nganti apal karo patrape Nardi ngono kuwi.
Rata-rata
warga desa Wanamerta padha nggarap sawah utawa tegal. Pancen ana sebageyan sing
dadi pegawai negeri, nanging cacahe bisa dietung nganggo driji. Mula dina-dina
masarakate mung tandang gawe ana sawah utawa tegalan. Kaya kang Sarjo lan
bojone, yu Sarti. Manten anyar sing lagi entuk setaun nggone omah-omah lan
durung nduweni momongan. Yu Sarti, prawan asli desa kono. Dene kang Sarjo asal
teka desa Wringinrejo, desa liya ana sisih kidul Wanamerta.
Dina
iku kang Sarjo isih kemulan brukut ana njero senthong. Isih rada aras-arasen
arep tangi merga wis ora sepira akeh penggaweyan ana sawah. Wis rong dina
kepungkur olehe bubaran tandur. Mula budhal menyang sawah mung saperlu
ngendhangi mbokmenawa ana tanduran sing perlu disulami karo ngatur iline banyu.
Beda karo bojone, yu Sarti tetep kaya biyasane. Bubar shubuh dheweke wis tangi.
Senajan gaweyan sawah wis rada sela, nanging tetep penggaweyan ngomah ora ana
lerene kanggo wong wadon. Tangi turu dheweke bablas njujug pawon. Ngentepna
panci isi banyu nang ndhuwur luweng, banjur nyumet tebonan garing kanggo
urup-urup. Pecelan kayu mahoni ditata ana cangkem luweng. Ngenteni sawetara
wektu nganti genine dadi. Bareng wis dirasa cukup, lagi dheweke menyat nang
padusan mburi omah. Lagi wae arep mathuk lawang padusan, dheweke mbengok
sakayange.
"Haaaaaaaaaaaaaahhhhh..... !" Yu
Sarti nggeblak, semaput.
Wis
jamak lumrah urip ana desa. Menawa ana tangga sing lagi nandhang kesusahan,
kabeh mesthi bakal padha teka ngertakna. Ora ketang mung takon kahanane.
Senajan ora bisa menehi pitulungan, saora-orane kuwi minangka wujud kawigaten
anggone tetanggan. Gandheng karo kedadeyan esuk mau, omahe kang Sarjo kebak
uwong. Ana njero senthong, kang Sarjo lungguh karo mijeti sikile bojone sing
isih durung sadar. Mbokdhe Karmi bola-bali ngolesi irunge yu Sarti nganggo
minyak kayu putih.
"Dhik....!"
aloke kang Sarjo lirih.
"Sadar ta, Dhik!" dheweke nerusna
anggone nyambat sing wedok.
"Sabar,
Jo", mbokdhe Karmi sing nyemauri karo ngelus pundhake kang Sarjo alon.
"Iki
mau critane kepiye ta, Jo?" pitakone mbokdhe Karmi.
"Aku
dhewe ya ra sepira genah, Dhe! Aku isih nang njero senthong. Dheweke wis nang
pawon nggodhog banyu. Lha terus ngerti-ngerti mbengok banter ngono, Dhe !"
kang Sarjo crita runtute kedadeyan sing dialami bojone. "Aku gage tangi.
Ngerti-ngerti Sarti wis nglethak ana ngarep padusan kono”
Lik Minten mlebu
karo nggawa teh anget sagelas gedhe.
"Wedangmu
digawa mrene sisan pa piye, Jo?" lik Minten nakoni kang Sarjo sakwise
ndeleh gelas ana ndhuwur meja. Dheweke sing nerusake penggaweyane yu Sarti ana
pawon.
"Ora
usah, Lik. Mengko tak jupuke dhewe," kang Sarjo semaur kanti polatan suntrut
nyawang kahanane bojone.
"Wedangmu
tak jupuke dhisik, Dhe", lik Minten metu tanpa ngenteni semaure mbokdhe
Karmi.
Meh
bareng karo tekane lik Minten sing njupukna wedange mbokdhe Karmi, yu Sarti
katon kruget-kruget tangane. Kang Sarjo gage nyandhak tangane sing wedok.
Digegem kenceng. Kaya-kaya arep menehi tambahan kekuwatan.
"Kang.....!"
suwarane yu Sarti keprungu alon.
"Iya,
Dhik! Wis tenangna dhisik atimu. Ora perlu crita dhisik," ujare kang Sarjo
ngedhem batine bojone.
Sakwise
ngenteni sawetara wektu, ambegane yu Sarti bali temata. Dheweke banjur tangi.
Karo direwangi sing lanang, dheweke lungguh. Polatane isih katon rada pucet.
Mbokdhe Karmi ngelungna teh sing wis rada adhem.
"Saiki
critakna geneya kok nganti kowe mbengok kae mau ? Malah njur semaput
barang?" kang Sarjo takon sakwise katon yu Sarti wis luwih tenang.
"Aku
kaget banget, Kang!" semaure yu Sarti lirih.
"Lha
sing njalari kagetmu kuwi apa ta, Ti?" lik Minten melu nyela takon.
"Bubar
ngurupna kayu ana luweng, aku gage nang padusan. Lha wong ya wis selak kebelet.
Lha kok mara-mara Nar njedul ana sandhing sumur ta, Lik !" kandhane yu
Sarti. Polatane balik katon pucet maneh.
"Woalaaaaaahhh......!
Nardi ki pancen kurang ajar kok. Ora pisan pindho nek gawe kagete uwong!"
aloke mbokdhe Karmi ngemu jengkel. Merga dheweke wis tau ngalami kedadeyan kaya
ngono kuwi.
Pancen omahe kang Sarjo
ungkur-ungkuran karo omahe lik Gito, bapake Nardi. Sumure uga isih dadi siji
senajan padusane dhewe-dhewe. Mula sasat saben wektu, keluwargane kang Sarjo
karo kluwargane lik Gito kepethuk ana sandhing sumur kono.
"Ya wis mengko tak kandhanane
lik Gito. Ben dituturi si Nardi kuwi. Kareben ora dibaleni maneh olehe sok gawe
kagete uwong!" ujare kang Sarjo.
"Iya, Jo! Aku dhewe ya wis
rumangsa gregeten nek ngrasakna polahe Nardi kuwi !" mbokdhe Karmi melu
nambahi.
"Nek upama
Nardi sing tak pethuki isuk mau, aku ora sepira kaget, Mbokdhe!" ujare yu
Sarti.
"Lha terus....?" lik
Minten nguber takon.
“Isuk mau sing methuki aku ana
cedhak sumur dudu Nardi…" semaure yu Sarti. "Nanging Narto!"
raine yu Sarti sakala pucet maneh. Tangane katon gemeter.
Kabeh sing krungu kandhane yu Sarti padha blangkemen. Ora ana sing
kumecap babar pisan. Kabeh padha kaget kepati.
Jombang,
2021
D' Eros Sudarjono, lahir
di Jombang 1970. Jebolan Fak. Bahasa & Sastra Inggris, selain menulis gurit
dan puisi juga melukis (sketsa). Puluhan karyanya sudah diterbitkan dalam
beberapa antologi. Beberapa naskah juga pernah dimuat dalam sejumlah
media cetak dan elektronik. Akun
medsos : Didik Eros Sudarjono (fb/ig)
***----------***
========
AMI MARITA G.
Ganda Legenda Bangsa
tak
banggakah engkau pada aset negara?
penyumbang
emas pertama untuk bangsa
kado
terindah 76 merdeka
pernah
di ragukan para pemirsa
tapi
ditunjukkannya dobrakan harapan bangsa
sejarah
kau ukir, prestasi kian mengalir
kelak
namamu akan selalu terkenang,
selalu
terbayang bagai kunang
seluruh
masyarakat berbangga,
terimakasih
legenda
MERDEKA!
Girimulyo,
2021
Ami Marita Gantari, siswi SMP N 1 Wates. Juara pertama Lomba Baca
Puisi tingkat SMP/Sederajat se-Kulonprogo yang diselenggarakan Dinas
Perpustakaan dan Kearsipan Kabupaten Kulonprogo tahun 2021. Tinggal di
Girimulyo Kulonprogo.
***----------***
Tidak ada komentar:
Posting Komentar