Mbah Wongso Cukur
Dening : Sumarno
Srengenge
munggah sadedeg dhuwure, tumlorong krasa anget
ngenani awak. Mbah Wongso klintong-klintong ngepit onthel saka ngomah tumuju
kios Pasar Manggen. Pasar tradhisional sangarep Balai Kalurahan, kang rame nalika
dina pasarane Pon lan Kliwon. Pasar Manggen biasa kanggo jujugan tetuku lan
bebakulan warga Kalurahan Manggen nyukupi kabutuhan urip saben dinane. Sejatine
omahe Mbah Wongso cerak karo pasar, kurang luwih setengah kilometer adohe. Mung
wae Mbah Wongso mangkat mulih pasar milih ngalang ngliwati dalan kang wus
diaspal alus.
Tengahan
esuk kuwi Mbah Wongso mangkat pasar. Kang dijujug kiose cukur kang mapan ing
kompleks pasar Manggen sisih ngarep. Senajan irung lan lambene katutup masker,
ananging ora ngilangi grapyak lan semanake marang sapa wae kang ditemoni
sadawane dalan tumuju pasar. Yuswane Mbah Wongso pancen klebu wus ora enom
maneh, meh ngancik pitung puluh taun. Ananging babagan tandang grayang nyukur isih
cukat trengginas, tliti setiti lan ngati-ati. Dijaluki modhel cukuran apa wae
bisa. Cukuran modhel jaman biyen apa modhel pungkasan, Mbah Wongso ora
kaiguhan. Dina iki Selasa Wage, Pasar Manggen ora pasaran. Nalika dina pasarane
Pon utawa Kliwon, wayah tengahan esuk ngene iki kahanan pasar isih ana wong
tetuku, senajan ora serame nalika tabuh nem utawa tabuh pitu esuk.
Ing
teras kios cukur, ana pelanggan telu kang wus nunggu arep cukur. Pelanggan iku
lungguh lincak pring kang mapan sakiwa tengen lawang mlebu kios. Bocah enom kang
rambute dicet kuning lungguh lincak sisih kiwa, dene ing lincak sisih tengen, ana
bapak-bapak ngajak anakke kang isih balita.
“Wis
kawit mau anggone padha ngenteni?” pitakone Mbah Wongso gapyak sawise
nyetandarke pit-e. Ora lali Mbah Wongso wisuh banyu nganggo sabun kang wus disedhiakake
ing ember sangarep kios nuhoni dhawuh pamarintah supaya netepi protokol
kesehatan ing mangsa mubale wabah korona iki.
“Sampun
Mbah.” jawabe bapak kang ngajak anak cekak.
“Karepe
mono aku kimau ya arep mangkat mruput. Nanging saben esuk ki wis mesthi kudu
werna-wernah luwih dhisik, endi kang kudu numpangke ceret, ngliwet, makani
pitik, ngisi tlowah lan liya-liyane …”
“Lhainggih,
Mbah. Pripun malih.”
“Pokoke
kawit mbak ayumu raono telung taun kapungkur kae, apa-apa saiki dakgarap
dhewe.” guneme Mbah Wongso karo ngetokake andhuk, kemul lan alat cukur
listrike. Saben dina Mbah Wongso tansah ngganti andhuk lan kemul cukure,
diwasuh genta-genti. Andhuk lan kemul kebak rentepan rambut cilik-cilik, krasa
gatel nyocog kulit pating clekit menawa ora digenti saben dina.
“Ayo
sapa dhisik antriane?” pitakone Mbah Wongso karo nyiapake kursi dhuwur kanggo
lungguh pelanggane. Bocah enom iku maju.
“Dicukur
modhel kepiye, Le?” pitakone Mbah Wongso marang pelanggan kapisan dina kuwi.
“Modhel
tiga dua satu.”
Mbah
Wongso cak cek tumadang gawe. Nyekel sirah lan miwiti nyukur miturut apa kang
dadi panjalukke pelanggan. Enom tuwa, cilik gedhe kabeh dilayani kanthi ati
seneng ora dibedak-bedakake.
***
Angin
mangsa ketiga klisis-klisis ngeburake bledug-bledug garing saka plataran Pasar
Manggen. Mbah Wongso leyeh-leyeh sawise maem awan. Sekesuk iki mau wus nyukur
nem sirah. Akeh sithik pelanggan kang teka, kabeh disukuri.
“Sepi
po Mbah?” dumadakan keprungu swara sora saka njaba, Mbah Wongso njenggelek
tangi ngungak sapa kang teka.
“Pangling
karo aku ora Mbah?” pitakone pawongan iku karo ngrokok kemelus.
“Kowe
rak Parmin, anakke Kang Dul to?”
“Bener
Mbah.”
“Menawa
arep cukur, kowe kudu wisuh tangan nganggo sabun luwih dhisik. Terus nganggo
masker. Menawa ora nganggo masker ngono kuwi, padha wae kowe arep nyilakani
aku. Sapa ngerti kowe nggawa virus.” guneme Mbah Wongso.
“Halahhh…”
“Yen
kowe ora gelem wisuh lan nganggo masker, aku emoh nyukur kowe. Kono gek ndang
wisuh tangan. Yen kowe ora nggawa masker, mengko dakwenehi.” guneme Mbah
Wongso. Nom-noman kang duwe jeneng Parmin kuwi metu wisuh karo nggrundhel.
“Wingi
tutup to Mbah?” pitakone Parmin ngenggokake omongan sawise Mbah Wongso miwiti
nyukur. Panjalukke Parmin dicukur cendhek kaya modhel tentara.
“Wingi
aku tutup merga daktinggal njupuk BLT neng Kantor Pos.”
“Wahh!”
Parmin njenggirat kaget krungu pocapane Mbah Wongso. “BLT?”
“Iya.
Kui lho dhuwit bantuane pamarintah marang wong cilik merga mubale wabah Covid.
Wingi aku tampa BLT cacahe nematus ewu.”
“Terus
dhuwite dienggo apa Mbah?”
“Isih
daksimpen nengomah, durung dakenggo apa-apa.”
“Nengomah?”
bathuke Parmin njengkerut.
“E
lhaa kok ora percaya. Isih wutuh daksimpen neng njero laci.”
Mripate
Parmin mlayu ngiwa nengen, pikirane blayangan.
***
Swara
kenthong saka cakruk pedhukuhan lamat-lamat keprungu kaping sewelas. Wayahe meh
tengah wengi. Ing kebon, swara jangkrik saut-sautan mamerake kabisane gawe
wirama. Mbah Wongso durung turu. Dhewekne isih ngrungokake giyaran wayang kulit
karemane lumantar radhio.
“Klothak!”
keprungu swara saka pawon. Mbokmenawa kucing anjlok saka ander omah utawa pring
rubuh kesenggol tikus, ngono batine Mbah Wongso. Mbah Wongso rumangsa mbiyeyet
ngantuk. Kayangapa kaget Mbah Wongso, dumadakan saka mburi awakke disikep. Gulune
diagar-agari bendho kang mingis-mingis.
“Pilih
nyawa apa bandha?”
“Eee…”
“Jawab!”
“Nyawa.”
jawabe Mbah Wongso glagepen, dhadhane krasa seseg. Tenagane wong iku banget
rosane. Bareng krungu pocapane Mbah Wongso, pawongan nyalawadi iku ngendhoni
sikepane, Mbah Wongso ndheprok, samba ngulatake pawongan kang raine ditutup
masker, isih karo ngagar-agarake bendho.
“Lungguh
sing apik yen kepengin slamet.” pangancame. Pawongan iku banjur ngglidhahi laci
meja. Ing njero laci ditemoake amplop putih isi dhuwit BLT kang isih wutuh.
“Awas,
ora sah bengok-bengok!” pawongan iku banjur njranthal metu liwat pawon, nggegem
amplop putih. Mbah Wongso kamitenggengen. Ora kepikiran arep nguyak utawa
bengok-bengok supaya maling iku diuyak warga. Babar blas ora. Mbah Wongso mung
bola-bali ngrapal dzikir atur panuwun marang Gusti Kang Akarya Jagad, isih
diparingi keslametan.
Kahyangan, pungkasan Agustus 2020
***--------***
Sumarno, kelahiran Kulonprogo 15 April
1979. Penulis artikel, berita, profil, reportase dan esai sastra Jawa di media
massa lokal. Bukunya yang pernah terbit Wesi Aji (antologi
cerkak,
2016). Karyanya masuk di beberapa buku antologi diantaranya: Tiga Peluru (kumpulan cerpen, 2010), Cahyaning Jagad (antologi geguritan, 2014), Nyanyian Bukit Menoreh (antologi
puisi,
2015), Gagaran Lampah (esai sastra Jawa, 2016), Ungak-Ungak (kumpulan cerkak, 2016), Tepung (antologi cerkak, 2017), Wulang Kumandhang (antologi cerkak, 2018), Sanja Wewira (antologi cerkak, 2019), Kedhung Ambabar Tama (antologi cerkak,
2020).
Masuk tim penulis buku Disbud Kulonprogo, diantaranya Kesenian Unggulan Kulon Progo (2015), Ki Regut Widi Prayitno (2017), Dari
Desa Menjadi Kota Sejarah Kota Wates (2018), Kulon Progo Mercusuar Nusantara, (2018), Makna Simbolik Upacara Adat Luwaran Tayub (2018), Naskah Lontar Jamus Kalimasada Koleksi Ki
Darmogati (2018) dan Sejarah
Perkebunan Teh (2019). Assisten Redaktur Majalah Sempulur Dinas Kebudayaan DIY ini tinggal Srikayangan Sentolo
Kulonprogo.
Tidak ada komentar:
Posting Komentar